गाम परदेशिया

मिथिला,मैथिली, मातृपदेश ;

 भागि  गेल  छलहूँ  परदेश ;
 बड्ड अख्क्षेलाहूँ ,अहुछिया कटलाहूँ  ;
 फेर आयल हमरा होश ;
 आ घुरी ऐलाहूँ  अपना देश ;

                 बस उतैरते माथ धुरी लगेलहूँ ;
                 पेलहूँ  प्राण ,आशीष आ स्नेह ;
                 गामक मंदिर घंटिक स्वर;
                महुआक गंध ,आ कोयलिक कुक ;

पुलक तर सँ  बहैत कमला बलान ;
ग्रामक द्वार "बंशी बाबू "क दलान ;
ख़ड़क' टाल आ पुड़ना मचान ;
थ्रेशरक दौण आ उसनत धान ;
            धुक-धुक कनहा मशीनक स्वर ;
            पुन:स्मरित भेल बेरका पहर;
            गुल्ली-डंडा आ लगड़ी खेलाय ;
            भागैत छलहूँ छोड़ी आफन तोरैत अपन माय
सब किछु अपन ,आ किछु परिवर्तन ;
 पुरना गाम आयल किछु आवर्तन;
साईकिल चलबैत  बलिकागन;
ग्रामक ओलतिये नव स्कूलक  प्रांगन ;
                                पग-पग बढ़ैत,आयल नविनता ;
                                पक्की सड़क आ सॉलर लाइट एकटा ;
                                 कोने-कोने गरल चापाकल ;
                                 आ मुखिया पोखैर,केचली तsर ;
पियर-पियर पंचायत भवन ;
आ नंगटे धिया-पूता "सेविका" क  संग ;
उरल "रामेश्वरनाथक "रंग ;
बकरी चरैत मंदिरक उपवन;
                                  नव कनिया संग सज्जल गाम ;
                                  रोड,पैन',आ इजोतक चिक्कन इंतजाम;
                                 मुदा कहा' अछि सोहर तान आ घुड़क जुटान ;
                                गुम अछि गप्प-लहड़ी आ स्नेह -मिलान ;
                                सुन्न ढलैया बनल अछि बिधबा क चान;
जै ठाम मिल क' जरैत छल होरी;
आब चारि कोण में चारि टा होरी ;
जैर रहल अछि बेर-बेरी ;
की यैह अछि?सुशासनक हेरी ;
                                   गाम छल,गामे रहत;
                                   हमर रंग बरु एकरो चढ़ल;
                                   हम घुड़ी ऐलौ,ई नहि आयत;
                                   कोनों बात नै हउ भाई;
                                  देख-देख कखनो त 'मोन पड़त विलायत ।